又想同大家分享一件真人真事！認識我嘅朋友可能已聽我分享過(請見諒！)，但我希望能讓更多人知道，當一個人身陷苦難時，旁人即使唔認識，好多時仍願意主動伸出援手！期望人人都能互相關愛、互助幫助！願與大家共勉之～
【風雨同路】
17-7-2017(一)，下午4：45，天色陰暗，滂沱大雨…
我同teammate出外工作，喺通往屋邨平台樓梯地面，突然發現雨水中夾雜一大攤紅色嘅水，同一袋麵包…
我正感疑惑，三分鐘前經過都冇，點解突然有一大攤疑似血水喺地下？
路邊一位阿嬸同我講，啱啱有個阿伯碌咗落樓梯！
原來，嗰啲真係血！
我即時上前尋找，見到餐廳門口一位老伯坐喺地上，全衫係血，有個男人幫佢按住後腦，但似乎止唔到血…
途人已報警，但落咁大雨，我好擔心…
伯伯清醒，能夠話我知佢個名、住邊座、唔係老人中心會員；我問佢屋企人電話，途人即時幫佢通知囡囡…
眼見七分鐘救護車仍未到，伯伯啲血不停流，我決定打返機構俾我一位護士同事，請教佢有效嘅止血方法。
幾分鐘後，遠見救護車到達迴旋處，我即時擔遮跑過去，同救護員揮手以作指示…
返到現場，衫褲濕咗大半！忽然我見到濕身嘅唔止我一個，仲有啱啱聽我電話，被我求救嘅護士同事！
焦急趕到現場嘅佢，手裡面拎住一對手套同一叠紗布片…
原來，佢收到我電話，知道情況危急，決定趕嚟支援！
佢同我一齊目送救護員幫阿伯包紥，阿伯背脊全部係血，全身打冷震，面青口唇白！
我同街坊安慰阿伯，叫佢唔駛擔心，佢囡囡會喺醫院等佢！
之後，護士同事行返機構，我就繼續陪teammate去區議員辦事處商討計劃。
今日，我雖然遲咗近一個鐘放工(今早我負責當值)…
返工濕身，放工又濕身…
但我冇後悔去協助一位我唔認識嘅伯伯…
更重要嘅係，我再一次感受到同事對我信任同支援！
一位雖然同我唔同服務單位，但經常同我一齊並肩作戰、熱心主動助人嘅好同事…
好多謝佢，經常同我一齊風雨同路！並肩作戰！
伯伯～祝福你平安！早日康復！
Search